विकास पोद्दार स्मृति कोषबाट छात्रवृत्तिसहित दुई विद्यार्थी सम्मानित

विराटनगर । मोरङको कटहरी गाउँपालिका-२ नयाँ बजार स्थित विकास पोद्दार स्मृति परिषदले दुई जना विद्यार्थीलाई छात्रवृत्ति प्रदान गरेको छ । विराटनगरको सेन्ट जोसेफ स्कुलका विनम्र घिमिरे र कटहरी गाउँपालिकाको भगवती आधारभूत विद्यालयकी आरुसी कामतलाई छात्रबृत्ति प्रदान गरेको हो ।

घिमिरेलाई २१ हजार र कामतलाई ११ हजार छात्रवृत्तिसहित सम्मान गरिएको परिषदका संरक्षक देवानन्द पोद्दारले बताए । कटहरी गाउँपालिका-४ का वडाध्यक्ष जिवेश्वर यादव, डाक्टर रामलाल सुतिहार, डाक्टर प्रतिभा मण्डल, विष्णुदेव मण्डललगायतले स्वर्गीय विकास पोद्दार अक्षय कोषबाट उनीहरूलाई सम्मान गरेका थिए ।

स्वर्गीय विकास पोद्दार जेहेन्दार विद्यार्थी थिए । उनको जन्म २०४९ साल भदौमा भएको थियो भने २०७९ साल पुषमा निमोनियाका कारण जर्मनीमा मृत्यु भएको थियो । विज्ञान सङ्कायमा स्नातकोत्तर गर्न उनी पूर्ण छात्रवृत्तिमा जर्मनी पुगेका थिए ।