धनकुटामा हायस दुर्घटना

धनकुटा । धनकुटा नगरपालिका-३ निगालेमा हायस दुर्घटना हुँदा दुई जना सामान्य घाइते भएका छन् । आज दिउँसो १ बजेतिर तेह्रथुमबाट राजविराज तर्फ जाने क्रममा प्र २-०१-००१ ख ०३१० नम्बरको हायस आफैँ अनियन्त्रित भएर दुर्घटना भएको हो ।

२१ जना यात्रु सवार हायस दुर्घटना हुँदा दुई जना सामान्य घाइते भएका जिल्ला प्रहरी कार्यालय धनकुटाका प्रहरी निरीक्षक विष्णु खड्काले जानकारी दिए ।

राजविराज नगरपालिका-७ का २१ वर्षीय सन्तोष कुमार यादव र १८ वर्षीय अजय कुमार खंग घाइते भएका हुन् । ‘उनीहरूको हात र खुट्टामा सामान्य चोट लागेको छ’, खड्काले संगालोखबरसँग भने, ‘उपचारका लागि जिल्ला अस्पताल पठाइएको छ ।’

अन्य यात्रुलाई गन्तव्यतर्फ पठाइसकिएको प्रहरी निरीक्षक खड्काले बताए । चालक सप्तरीका ३५ वर्षीय विष्णु रजक तत्काल फरार रहेकाले खोजी कार्य भइरहेको प्रहरीले जनाएको छ । हायसको अगाडिको भाग बाटोमुनि पुगेको थियो ।