सुनसरीमा सवारी दुर्घटनामा दुई जनाको मृत्यु

विराटनगर । सुनसरीको दुई छुट्टाछुट्टै स्थानमा भएका सवारी दुर्घटनामा दुई जनाको मृत्यु भएको छ । हिजो इटहरी र दुहबीमा भएका दुर्घटनामा मोटरसाइकल चालक र पैदलयात्रीको मृत्यु भएको हो ।

इटहरी उपमहानगरपालिका-१३ कालीमन्दिर स्थित कोशी लोकमार्गमा दक्षिणबाट उत्तरतर्फ जाँदै गरेको प्र १-०२-०४८ प ३४९७ नम्बरको मोटरसाइकललाई प्र १-०१-००२ त ०२४९ नम्बरको ट्याक्टरले ठक्कर दिएको थियो ।

ट्याक्टरको ठक्करबाट मोटरसाइकल चालक मोरङको रंगेली नगरपालिका-६ का ४३ वर्षीय बलराम सरदारको मृत्यु भएको हो । ट्याक्टरको ठक्करबाट घाइते भएका उनको विराट टिचिङ अस्पतालमा उपचारका क्रममा मृत्यु भएको प्रहरीले जनाएको छ ।

यसैगरी हिजो बेलुका सुनसरीको दुहबी नगरपालिका-८ जुटमिल अगाडि इटहरीतर्फ जाँदै गरेको बागमती प्रदेश ०१-०२७ च ०४८२ नम्बरको कारले ठक्कर दिँदा पैदलयात्रीको मृत्यु भएको छ ।

बाटो क्रस गर्दै गरेका पैदल यात्री सोही स्थानका ४५ वर्षीय गणेश गुप्ताको मृत्यु भएको प्रहरीले जनाएको छ । दुर्घटनामा गम्भीर घाइते भएका गुप्ताको उपचारका क्रममा विराट टिचिङ अस्पतालमा मृत्यु भएको हो ।

ट्याक्टर चालक दुहबी-१० का २३ वर्षीय अभिराम माझी र कार चालक सुन्दरहरैँचा-३ का २४ वर्षीय राम नाथ जोगीलाई नियन्त्रणमा लिएर थप अनुसन्धान भइरहेको प्रहरीले जनाएको छ ।