मोरङका विभिन्न स्थानबाट १७ जना फरार प्रतिवादी पक्राउ

विराटनगर । मोरङका विभिन्न स्थानबाट १७ जना फरार प्रतिवादी पक्राउ परेका छन् । गत मंसिर २४ गतेदेखि पुस २ गतेसम्ममा विभिन्न मुद्दामा फरार रहेका १७ जना पक्राउ परेका हुन् ।

जिल्ला अदालत मोरङले कैद तथा जरिवाना तोकेर फरार रहेका प्रतिवादीलाई पक्राउ गरिएको मोरङ प्रहरीका प्रवक्ता डीएसपी वेद प्रकाश जोशीले जानकारी दिए ।

जिल्ला प्रहरी कार्यालय तथा मातहतका प्रहरी कार्यालयबाट खटिएको प्रहरी टोलीले उनीहरूलाई नियन्त्रणमा लिएको हो । यसरी पक्राउ पर्नेमा जुवा, कुटपिट, चोरी, लागूऔषध, घरेलु हिंसा, लेनदेन, चेक अनादर तथा सवारी ज्यान मुद्दालगायतमा फरार रहेका छन् ।

उनीहरूलाई मोरङ जिल्ला अदालतमा दाखिला गराइएको डीएसपी जोशीले जानकारी दिए ।