मोरङको सलकपुरमा टिपरको ठक्करबाट स्कुटर चालकको मृत्यु

विराटनगर । मोरङको सुन्दरहरैँचा नगरपालिका-९ सलकपुरमा टिपरको ठक्करबाट एक जनाको मृत्यु भएको छ ।

हिजो साँझ विराटचोकबाट गछियातर्फ आउँदै गरेको प्र १-०२-०५४ प ३५५८ नम्बरको स्कुटरलाई सोही दिशातर्फ आउँदै गरेको ना ७ ख ३२२३ नम्बरको टिपरले ठक्कर दिएको थियो ।

टिपरको ठक्करबाट स्कुटर चालक पथरी शनिश्चरे नगरपालिका-३ हसन्दहका ४४ वर्षीय एम बहादुर रायमाझी गम्भीर घाइते भएका थिए । उपचारका लागि विराटनगरको नोबेल अस्पताल ल्याइएकोमा चिकित्सकले मृत घोषणा गरेका थिए ।

टिपर चालक सुन्दरहरैँचा-४ का ४४ वर्षीय देब कुमार खुलाललाई नियन्त्रणमा लिएर घटनाको अनुसन्धान सुरु गरिएको प्रहरीले जनाएको छ । दुर्घटनाको कारण टिपरको तीब्र गति रहेको प्रहरीको निष्कर्ष छ ।