कोशीमा स्विस सरकारको सहयोगमा चार वटा पदमार्ग निर्माण गरिदै

विराटनगर । कोशी प्रदेशमा पर्यटनको नयाँ सम्भावनालाई मध्यनजर गर्दै पदमार्गमा आधारित पर्यटन विकास आयोजना सुरु गरिएको छ । स्विस सरकारको सहयोगमा २०८५ साल साउन सम्ममा परियोजना सक्ने योजना छ ।

स्विस सरकारको १ अर्ब ३५ करोड १५ लाख, कोशी प्रदेश सरकारको ४५ करोड ८७ लाख, कोशी प्रदेशका २९ वटा स्थानीय तहको ४४ करोड ६७ लाख र नेपाल सरकारको १९ करोड ९२ लाख गरेर परियोजनाको लागत २ अर्ब ४५ करोड ६१ लाख रहेको छ ।

परियोजना अन्र्तगत चियाबारी पदमार्ग (इलाम, फिक्कल, श्रीअन्तु), फाल्गुनन्द पदमार्ग ( फिदिम, छिन्ताप्पु, सन्दकपुर, माइपोखरी, इलाम) लालीगुराँस पदमार्ग (तुम्लिङटार, खादबारी, नुम गुफा पोखरी, बसन्तपुर, जलजले, तीनजुरे, मिल्के) र मुन्धुम पदमार्ग (तावाभञ्ज्याङ, ट्याम्केडाँडा, चखेवा, डालसिंगे, धोत्रे, जलजले, हाँसपोखरी, मयुङ्डाँडा) रहेका छन् ।

कोशी प्रदेशका मुख्यमन्त्री हिक्मतकुमार कार्कीले विकास र समृद्धिका लागि पर्यटन नै मूल आधार भएको बताए । विराटनगरमा आयोजित पदमार्गमा आधारित पर्यटन विकास परियोजनाको शुभारम्भ गर्दै मुख्यमन्त्री कार्कीले यस्तो बताएका हुन् ।

उनले पर्यटनबाट नै विकासको कायापलट गर्न सकिने उल्लेख गरे । प्रदेशको सामर्थ, पहिचान र विकास नै पर्यटन भएको उनको भनाइ थियो ।

कार्यक्रममा स्विस सरकारकी राजदूत डा. डेनियल म्युउल्यीले पदमार्ग मार्फत आर्थिक उन्नति, रोजगारी र अवसरहरू खोजी हुने बताइन् । उनले सङ्घीयतालाई बलियो बनाउनका लागि स्विस सरकार नेपाल सरकारसँग हातेमालो गर्दै अघि बढेको उल्लेख गरिन् ।