गाडीमा सरकारी नम्बर प्लेट टाँसेर गाँजा तस्करी

धरान । धनकुटाबाट धरान आउँदै गरेका दुईवटा गाडीबाट प्रहरीले ६९० किलो गाँजा बरामद गर्यो । बा १ झ ४६०५ र बा १ झ ५१२७ नम्बरका सरकारी नम्बर प्लेट भएका गाडीबाट गाँजा बरामद गर्न प्रहरीले गोली नै चलाउनु पर्यो ।

प्रहरीले एक जनालाई पक्राउ गर्न सफल भयो भने अझै एक जना फरार छन् । उनको खोजी भइरहेको इलाका प्रहरी कार्यालय धरानले जनाएको छ । धरानका प्रहरी नायब उपरीक्षक (डीएसपी) प्रकाश जबेगुका अनुसार हिजो साँझ ७ बजे गाँजा बोकेर भागेको ५१२७ नम्बरको गाडीलाई नियन्त्रणमा लिन गोली चलाउनु परेको हो । त्यसपछि धरान-१३ मा गाडी छाडेर चालक भागेका छन् ।

धरान उपमहानगरपालिका–१३ अमरहाटबाट सरकारी नम्बर प्लेट राखिएको ४६०५ नम्बरको गाडीसहित चालक मोरङको सुन्दरहरैँचा नगरपालिका-११ का ३६ वर्षीय श्यामकुमार विश्वकर्मालाई नियन्त्रणमा लिएको उनले बताए ।

‘यही कार्यालयको गाडीको नम्बर प्लेट राखेको भनेर यकिन भइसकेको छैन,’ डीएसपी जबेगुले संगालोखबरसँग भने, ‘प्रारम्भिक अनुसन्धानका क्रममा अख्तियार र कानुन मन्त्रालयको नम्बर प्लेट भएको गाडी भनिए पनि यो नम्बरको गाडी त्यहाँ छैन ।’

यस विषयमा थप अनुसन्धान भइरहेको उनको भनाइ छ ।