धरानमा छात्राहरूलाई यौन दुर्व्यवहार गरेको आरोपमा शिक्षक पक्राउ

विराटनगर । सुनसरीको धरान-१७ मा रहेको माउन्ट मोरिया स्कुलका शिक्षक २३ वर्षीय असित ठकुरीलाई प्रहरीले पक्राउ गरेको छ । छात्राहरूलाई यौन दुर्व्यवहार गरेको आरोपमा ठकुरी पक्राउ परेका हुन् ।

उनलाई यसभन्दा अगाडि पनि यही आरोपमा धरानकै एउटा विद्यालयले निकालेको थियो । त्यतिखेर भने प्रहरीमा उजुरी परेको थिएन ।

विद्यार्थीहरूले उजुरी दिएपछि सोमबार ठकुरीलाई पक्राउ गरिएको इलाका प्रहरी कार्यालय धरानका प्रहरी नायब उपरीक्षक (डीएसपी) प्रकाश जबेगुले जानकारी दिए ।

‘कक्षा ९ मा पढ्ने छात्राहरूलाई दुर्व्यवहार भएको भनेर उजुरी परेपछि उनलाई पक्रिएका हौं’, डीएसपी जबेगुले संगालोखबरसँग भने, ‘उनलाई यस भन्दा अगाडि पनि एउटा विद्यालयले निकालेको रहेछ । उजुरी परेपछि वाल दुर्व्यवहारमा मुद्दा चलाइएको छ ।’

शिक्षक ठकुरीले छात्राहरूलाई ह्वाट्सएप र म्यासेन्जरबाट दुर्व्यवहार गरेको पाइएको उनले बताए । उनले अश्लिल म्यासेज र फोटोहरू पठाउने गरेको खुलेको जबेगुको भनाइ छ । यस विषयमा थप अनुसन्धान भइरहेको डीएसपी जगेबुले जानकारी दिए ।