संगालोखबर 
धनकुटा । धनकुटाको सहिदभूमि गाउँपालिका–३ मा भीरबाट लडेर बालिकाको मृत्यु भएको छ । सहिदभूमि-३ स्थित च्याब्रुङ भीरबाट लड्दा स्थानीय रेगन राईकी छोरी ५ वर्षीया अनुष्काको मृत्यु भएको हो ।
Advertisement
अनुष्का, सहिदभूमि-४ पिप्लेस्थित पञ्चकृष्ण माध्यमिक विद्यालयमा अध्ययनरत थिइन् । शनिवार अपरान्ह करिब ५ बजे स्कुलबाट घर फर्किने क्रममा बाटोमा चिप्लिएर उनी भीरबाट खसेकी हुन् । सहिदभूमिमा शनिवार पनि स्कुल लाग्ने गरेको छ, साप्ताहिक बिदा बुधवार दिने गरिएको छ ।
लडेर गम्भीर घाइते भएकी उनलाई उपचारका लागि धनकुटा जिल्ला अस्पताल ल्याइएको थियो । उपचारकै क्रममा राती करिब ९ बजे उनको मृत्यु भएको धनकुटाका प्रहरी निरीक्षक विष्णु खड्काले जानकारी दिए ।
मृतक बालिकाको शवलाई पोष्टमार्टमका लागि जिल्ला अस्पतालमै राखिएको छ ।
