तेह्रथुम । तेह्रथुम सदरमुकाम म्याङलुङ बजारमा आज बिहान आगलागी भएको छ । म्याङलुङ नगरपालिका–१ लोकतान्त्रिक चौकमा आगलागी भएको हो । आगलागीमा परी ५ वटा घर जलेको प्रहरीले जनाएको छ ।
Advertisement
बिहान करिब ६ बजे स्थानीय अर्जुन अधिकारीको घरबाट आगलागी सुरु भएको हो । उनको घरमा श्राद्ध परेकाले बिहान सेलरोटी पकाउँने क्रममा चुल्होवाट आगो सल्किएको बताइएको छ । आगोले छिमेकका अन्य घरहरु पनि जलेका हुन् । आगो नियन्त्रणका लागि म्याङलुङ नगरपालिकाको दमकल खटिएको थियो ।
दमकलको सहयोगमा नेपाल प्रहरी, सशस्त्र प्रहरी र स्थानीयबासीले दुई घण्टापछि करिब ८ बजे आगो नियन्त्रणमा लिएको जिल्ला प्रहरी कार्यालय तेह्रथुमका प्रवक्ता इन्सपेक्टर कोमल ठाकुरले जानकारी दिए । ‘आगो नियन्त्रणमा आइसकेको छ,’ इन्सपेक्टर ठाकुरले संगालोखबरसँग भने, ‘पूर्ण र आंशिक गरी पाँच वटा घर जलेका छन् । के–कति क्षति भयो भन्ने यकिन भइसकेको छैन । हामी क्षतिको विवरण संकलन गर्दैछौ ।’
आगोले दुई वटा घर पूर्ण रुपमा जलेका छन् । तीन वटा घरमा आंशिक क्षति पुगेको प्रहरीले जनाएको छ । आगोमा परेर घरधनी अर्जुन अधिकारी सामान्य घाइते भएका छन् । आगोले उनको अनुहारको केही भाग डढेको छ । घटनाको विस्तृत विवरण आउँन वाँकी छ ।
