सुनसरी । जग्गा मिचेर संरचना बनाउँनेहरुविरुद्ध इटहरी उपमहानगरपालिकाका मेयर द्धारिकलाल चौधरी ‘एक्सन’ मा उत्रिएका छन् । मेयर चौधरीले मंगलबार खनार नजिकै एक व्यवसायीले बनाउँदै गरेको कम्पाउण्डवाल भत्काएका छन् ।
Advertisement
नहरको जमिन मिचेर संरचना बनाएको भन्दै मेयर चौधरीले नगर प्रहरी, दमकल, स्काभेटर र नेपाल प्रहरीसहित गएर वाल भत्काउँन लगाएका हुन् । सार्वजनिक जग्गा मिचेर संरचना बनाएका कारण धेरै ठाउँमा बर्खा याममा हिलो र डुवानको समस्या भइरहेको छ । यस्तो समस्या हटाउँन खोला, पैनी, वाटो मिचेर वनाएका संरचना भत्काउने ‘एक्सन’ सुरु गरेको मेयर चौधरी बताउँछन् । ‘कहाँ–कहाँ भत्काउने भनेर वतायो भने स्टेअर्डर लिन अदालत गइहाल्छन्, त्यसैले पहिले एक्सन लिएपछि मात्र थाहा हुन्छ,’ चौधरीले भने ‘धेरै ठाँउमा सार्वजनिक जग्गा मिचेर संरचना भत्काइएका छन्, सवै ठाँउमा भत्काउन एक्सन सुरु गरेको छु ।’
इटहरीको १३ र १४ नम्वर हुदै वडा नम्वर १२ स्थित राजमार्ग जोड्ने वहुवर्षीय योजनामा एउटा कल्भर्ड थुनिने गरी वनाइएको संरचना पनि भत्काएर वहाव खोलिएको उनले जानकारी दिए । अनाधिकृत संरचना हटाउन सूचना गरिने र नमानेमा उपमहानगरपालिकाले भत्काएर नियमानुसार लागेको खर्च असुल उपर गर्ने मेयर चौधरीले चेतावनी दिएका छन् ।
उनले गत बर्ष पनि केही संरचनाहरु भत्काएका थिए । हरेक संरचना निर्माण गर्दा नगरपालिकासँग अनुमति लिएर नक्सा पास गरेर बनाउँन सवैलाई छुट दिदा दिदै पनि नटेर्ने र स्थानीय सरकारलाई हेप्ने गरेकाले त्यस्तालाई नछाड्ने उनी बताउँछन् । चुनाव आउन लागेका बेला नेताहरुले एक्सनमा नआउन आग्रह गरे भने पनि नमान्ने उनले दावी गरे । खोला पैनीको जग्गा अतिक्रमण गरेर संरचना बनाउने गरेका कारण इटहरी डुवानमा पर्ने गरेका कारण एक्सनमा उत्रनु परेको मेयर चौधरीको भनाई छ ।
