संगालोखबर 
विराटनगर । विराटनगरमा आज सञ्चालित अन्तर सञ्चारगृह फुटसल प्रतियोगिताको उपाधि द शब्द एक्सप्रेसले जितेको छ । जेएनएल फुटसलमा भएको प्रतियोगिताको फाइनलमा मकालु टेलिभिजनलाई ७-१ गोलले पराजित गर्दै शब्द एक्सप्रेसले उपाधि जितेको हो ।
ब्रेकिङ नेपाल न्यूजको प्रथम वार्षिकोत्सवको अवसरमा आयोजित प्रतियोगितामा विराटनगरका १४ सञ्चारगृहको टिमबीच प्रतिष्पर्धा भएको थियो ।
प्रतियोगिता उद्घाटन गर्दै विराटनगर महानगरकी उपमेयर शिल्पा निराला कार्कीले सञ्चारगृहबीचको सम्बन्ध थप प्रगाढ बनाउन यो खेलले भूमिका निर्वाह गर्ने विश्वास व्यक्त गरिन् ।
प्रतियोगिताका विजेता र उपविजेतालाई भदौ ११ गते कार्यक्रम आयोजना गरेर पुरस्कार प्रदान गरिने आयोजक ब्रेकिङ नेपाल न्यूजका सञ्चालक मीनकुमार नवोदितले जानकारी दिए ।
