धनकुटामा प्रहरीद्वारा दश हजार गाँजाको बोट नष्ट

धनकुटा । धनकुटाको विभिन्न स्थानमा अवैध तरिकाले लगाइएको गाँजा प्रहरीले नष्ट गरेको छ । पाख्रिबास नगरपालिका, सहिदभूमि र साँगुरीगढी गाउँपालिकाका विभिन्न स्थानमा प्रहरीले गाँजा नष्ट गरेको हो ।

आफैँ उम्रिएको तथा अवैध रूपमा लगाइएको गाँजाको बोट नष्ट गरिएको जिल्ला प्रहरी कार्यालय धनकुटाले जनाएको छ । इलाका प्रहरी कार्यालय छिन्ताङ, भेडेटार र प्रहरी चौकी हिलेबाट खटिएको प्रहरी टोलीले सहिदभूमिमा छ हजार पाँच सय बोट गाँजा नष्ट गरेको छ ।

यस्तै साँगुरीगढीमा दुई हजार पाँच सय र पाख्रिबासमा नौ सय बोट गाँजा नष्ट गरिएको छ । यो अभियान निरन्तर सञ्चालन गरिने जिल्ला प्रहरी कार्यालय धनकुटाले जनाएको छ ।