संगालोखबर सम्वाददाता

विराटनगर । नेपाली कांग्रेस प्रदेश नम्बर १ संसदीय दलले ताप्लेजुङको मेरिङदेन गाउँपालिका–३ दोभान बजारका आगलागी पीडितलाई खाद्यान्नसहित राहत सामग्री वितरण गरेको छ । कांग्रेसका प्रमुख सचेतक केदार कार्कीको नेतृत्वमा प्रदेश सांसद प्रतापप्रकाश हाङगामा, चन्द्रप्रसाद श्रेष्ठ लगायत संसदीय टोली आगलागी प्रभावित क्षेत्र पुगेर पीडित ८० परिवारलाई खाद्यान्न र लत्ताकपडा प्रदान गरेको हो ।

Advertisement

प्रमुख सचेतक कार्कीका अनुसार सबै परिवारलाई २० केजीका दरले चामल ८० बोरा, दाल एक क्वीन्टल, पाँच बोरा भूजा, नुनतेल, साबुन, चाउचाउ, म्याटरेक्स, तन्ना, ब्लांकेट एकसय थान, बालबच्चालाई लत्ताकपडा र प्रति परिवारलाई तीन जोरका दरले जुत्ता–चप्पल उपलब्ध गराइएको छ । संसदीय दलले शुक्रबार कार्यक्रमस्थलमा उपलब्ध पीडित परिवारलाई वितरण गरी बाँकी परिवारका लागि भने स्थानीयको रोहबरमा मेरिङदेन गाउँपालिकाका अध्यक्ष गणेशबहादुर लिम्बूलाई वितरण गर्न बाँकी सामग्री हस्तान्तरण गरेको थियो । लिम्बूले गाउँपालिकाको समयन्त्रमार्फत बाँकी परिवारलाई राहत वितरण गर्नेछन् ।

‘आगलागीले बजार पूर्ण रुपमा ध्वस्त भएको रहेछ । पीडित परिवारको पुर्नस्थापना निकै कठिन देखिएकोले यसमा प्रदेश १ सरकारले विशेष राहत प्याकेज नै घोषणा गर्नुपर्ने हाम्रो माग छ । संसद बैठकमा समेत स्थानीयको मागलाई जोडदार ढंगले उठाउने छौं,’ सचेतक कार्कीले भने । घटना लगत्तै दोभान बजार पुगेका प्रदेश १ का मुख्यमन्त्री शेरधन राईले प्रति परिवार ५० हजार उपलब्ध गराउने घोषणा गरेको भएपनि त्यो अपुग हुने देखिएको कार्कीले बताए ।

राहत तथा पुर्नस्थापनाको लागि प्रति परिवार कम्तिमा ३ लाख उपलब्ध गराउन र सरकारकै पहलमा बजार पुर्ननिर्माणदेखि स्थानीयको राहतका लागि सहुलियतपूर्ण ऋणसमेत दिन स्थानीयले माग गरेको कार्कीले जानकारी दिए । कांग्रेस संसदीय दलसंगै पुगेको फुड बैंक लायन्स क्लब अफ इटहरी सुनसरीले पीडित परिवारलाई चामल उपलब्ध गराएको अध्यक्ष ई. भविन खड्का र चेयर पर्सन निर्मला चौधरीले बताए । ताप्लेजुङको दोश्रो ठूलो बजार दोभानमा एघार दिनअघि भीषण आगलागी भएको थियो ।

सत्य, तथ्य र निष्पक्ष खबरका लागि संगालोखबरको फेसवुक पेज लाइक गर्नुस् ।
युटुब च्यानल सब्स्क्राइब गर्नुस् ।
Advertisement

तपाईको प्रतिक्रिया

error: Content is protected !!