महालक्ष्मीको छैठौं नगर सभा सुरु, नगरको आफ्नै लोगो सार्वजनिक

धनकुटा । धनकुटाको महालक्ष्मी नगरपालिकाको छैठौं नगर सभा सोमबारबाट सुरु भएको छ । नगर सभाले कार्यक्रम संसोधन/रकमान्तर, राजश्व र कार्यपालिका बैठकहरुका निर्णय पारित गरेको छ ।

चालु आर्थिक बर्ष २०७७/०७८ का लागि स्वीकृत बार्षिक कार्यक्रम मध्ये २५ वटा कार्यक्रमको ८९ लाख ७७ हजार बजेटलाई ९ वटा कार्यक्रम सञ्चालन गर्ने गरी बजेट रकमान्तर गरी संसोधन गरिएको छ । सभामा सभाध्यक्ष एवं नगर प्रमुख पर्शुराम नेपालले कार्यक्रम संसोधन तथा रकमान्तर प्रस्तुत गर्न नगरका उप–प्रमुख मञ्जु कुमारी कार्कीलाई अनुमति दिएका थिए । उप–प्रमुख कार्कीले प्रस्तुत गरेको संसोधन तथा रकमान्तर प्रस्ताव नगर सभाले सर्वसम्मत पारित गरेको हो । त्यस्तै नगरपालिकाको अर्थ सम्बन्धि विधेयक २०७७/०७८ सँग बाझिने नगरपालिकाका अन्य ऐनहरु बाझिएको हकसम्म बदर हुने र उक्त बिषयहरु नगरको अर्थसम्बधि विधेयक बमोजिम हुने निर्णय नगरसभाले पारित गरेको छ ।

चालु आर्थिक बर्षको हालसम्म नगर कार्यपालिकाको ११ वटा बैठकले गरेका १३८ वटा निर्णयहरु नगर सभाले सर्वसम्मत पारित गरेको छ । बिभिन्न निर्णय पारित गरेपछि नगर प्रमुख एवं सभाध्यक्ष नेपालले नगरसभाको बैठक आगामी फागुन २९ गते पुनः बस्ने गरी स्थगित गरेको घोषणा गरेका छन् ।

महालक्ष्मीको आफ्नै लोगो सार्वजनिक
महालक्ष्मी नगरपालिकाले नगरको आफ्नै लोगो सार्वजनिक गरेको छ । धनकुटा जिल्लाका सात वटै स्थानीय पालिका मध्ये महालक्ष्मी नगरले पहिलो पटक आफ्नै लोगो प्रयोगमा ल्याउँन लागेको हो ।

नगरको छैठौं नगर सभाले लोगो अनुमोदन तथा सार्वजनिक गर्ने निर्णय पारित गरेको छ । महालक्ष्मी नगरपालिकाको नक्साभित्र निर्माण गरिएको लोगोमा स्थानीय ठाउँ, उत्पादन र परिवेश झल्कने बिषय समावेश गरिएको नगर प्रमुख नेपालले जानकारी दिए । ‘महालक्ष्मीको आफ्नै लोगो सार्वजनिक गरेका छौं । अब नगरले यही लोगो प्रयोगमा ल्याउँछ,’ नगर प्रमुख नेपालले भने–‘नगरपालिका स्थानीय सरकार भएकाले स्थानीय सरकारको आफ्नै लोगो प्रयोग गर्न लागेका हौ ।’