साँगुरीगढी, १९ असार । अबिरल बर्षाका कारण झरेको पहिरोले सडक पुरेपछि महाभारत–भेडेटार ग्रामिण सडक अवरुद्ध भएको छ । चार दिनदेखिको बर्षाका कारण साँगुरिगढी–६ स्थित भेडेटार नजिकको जङ्गलमा पहिरो खसेर सडक अवरुद्ध भएको हो ।
पहिरोले करिब एक सय मिटर सडक पुरिएको स्थानीय जगत राईले जानकारी दिए । सडक अवरुद्ध भएपछि गाउँमा उत्पादित कृषिजन्य बस्तु निर्यात र दैनिक उपभोग्य बस्तु आयातमा समस्या भएको छ ।
Advertisement
किसानले उत्पादन गरेको तरकारी, अदुवा लगायत कृषिजन्य उत्पादन निर्यातमा समस्या भएको स्थानीय सूर्यबहादुर राईले बताए । बैकल्पिक सडक पनि अवरुद्ध छ ।
धारापानी र कोलबोटेबीचको सडकमा ठूलो ढुङ्गा झरेर सडक अवरुद्ध भएको हो । दुईवटै सडक अबरुद्ध भएपछि थप समस्या भएको स्थानीय अनिल राईले गुनासो गरे ।
सडक अवरुद्ध भएर समस्या भएपछि स्थानीयले सडक मर्मतको मागसमेत गरेका छन् ।
