धनकुटा, ३० जेठ । धनकुटा नगरपालिका–२ भीरगाउँका गोविन्द निरौलाले बिपन्न परिवारका दुई बालिकाको पढाई खर्च बेहोर्ने भएका छन् । निरौलाले पाख्रीवास–२ का सात वर्षीया स्वस्तिका समाल र नौ वर्षीया जयन्ती समाललाई सदरमुकाममा ल्याएर आफै खर्च बेहोरी पढाईदिने भएका हुन् ।
Advertisement
धनकुटा ईन्स्टिच्यूट अफ हेल्थ साईन्सको प्रशासकीय अधिकृतसमेत रहेका निरौलाले धनकुटाको गोकुण्डेश्वर बालमन्दिर माध्यमिक विद्यालयको कक्षा २ मा स्वस्तिकालाई र कक्षा ४ मा जयन्तीलाई भर्ना गराएका छन् ।
दुवै जनाको कक्षा १० सम्म विद्यालय पोशाक, शैक्षिक सामाग्री र खाजा लगायत सवै खर्च निरौलाले बेहोर्ने भएका हुन् ।
पढाईका लागि आवश्यक खर्च अभाव हुँदा उनीहरु स्कुल जाँन नसक्ने अवस्था रहेकाले आफुले खर्च बेहोरेर पढाउँन सुरु गरेको निरौलाले बताए ।
कमजोर आर्थिक अवस्थाकै कारण शिक्षाबाट बन्चित बन्न नपरोस भनेर बालिकाको अभिभावकत्व ग्रहण गरेको भन्दै निरौलाले बिपन्न बालबालिकालाई आफुले सक्दो सहयोग गर्ने प्रतिवद्धता पनि जनाएका छन् ।
