धनकुटा, १३ जेठ । कांग्रेस सभापति शेरबहादुर देउवा नेतृत्वको तत्कालिन सरकारले धनकुटालाई अन्याय गरेको भन्दै कांग्रेस धनकुटाबाट दिईएको सामुहिक राजिनामा फिर्ता भएको छ ।
देउवा नेतृत्वको सरकारले धनकुटालाई अन्याय गर्दै प्रदेश–१ को अस्थायी राजधानी बिराटनगर तोकेको बिरोधमा कांग्रेस जिल्ला कार्यसमिति, गाउँ तथा नगर समिति, भातृ संस्थाका पदाधिकारी र सक्रिय सदस्यले सामुहिक राजिनामा दिएका थिए ।
गत माघ ६ गते उनीहरुले पत्रकार सम्मेलन गरी सामुहिक राजिनामा घोषणा गर्दै धनकुटालाई प्रदेशको राजधानी तोक्न माग गरेका थिए । उनीहरुले पार्टी कार्यालय बन्द गरी पार्टी कार्यालयमा कालो झण्डा गाडेका थिए । तर, कांग्रेस केन्द्रिय कार्यालय र पार्टी सभापति शेरबहादुर देउवाले आग्रह गरेको भन्दै चार महिनापछि राजिनामा फिर्ता लिईएको हो ।
दुई हप्ताअघि धनकुटा आइपुगेका कांग्रेस प्रवक्ता तथा धनकुटा प्रतिनिधि विश्वप्रकाश शर्माले कांग्रेस केन्द्रले धनकुटाको माग सम्बोधन गर्ने प्रतिवद्धता जनाएपछि ताला खोलेर कालो झण्डा हटाई पार्टीको झण्डा राखिएको थियो ।
पार्टी कार्यालय र सभापती देउवाले मौखिक तथा लिखित आग्रह गरेका कारण राजिनामा फिर्ता लिईएको कांग्रेस धनकुटा सचिव विजय सन्तोषी राईले जानकारी दिए ।