एमाले सचिवालय बैठकले सार्वजनिक गर्यो विरोधका कार्यक्रम

काठमाडौं । नेकपा एमालेको सचिवालय बैठकले विरोधका कार्यक्रम सार्वजनिक गरेको छ । पार्टी अध्यक्ष एवं पूर्वप्रधानमन्त्री केपी शर्मा ओली पक्राउको विरोधमा बैठकले चार वटा निर्णय गरेको हो ।

आज बसेको सचिवालय बैठकले अध्यक्ष ओलीलाई तत्काल रिहाइको माग गर्दै प्रतिवाद गर्ने निर्णय गरेको छ । एमाले सचिव महेश बस्नेतका अनुसार आज अपराह्‍न ३ बजे जनसंगठनहरूको तर्फबाट प्रत्येक जिल्लाको सदरमुकाममा विरोध प्रदर्शन गर्ने निर्णय भएको छ ।

यस्ता छन् निर्णयहरू-
१. आम जनसमुदाय, नागरिक समाजको दृढताको साथ कानुनी तथा राजनीतिक रूपमा सशक्त प्रतिवाद गर्ने ।
२. प्रत्येक जिल्लाको सदरमुकाममा आज अपराह्‍न ३ बजे जनसंगठनहरूको तर्फबाट विरोध प्रदर्शन गर्ने ।
३. प्रत्येक जिल्लामा भोलि चैत्र १५ गते १२ बजे जिल्ला पार्टी कमिटीको आयोजनामा व्यापक प्रदर्शनसहित प्रमुख जिल्ला अधिकारी कार्यालयमा विरोधपत्र बुझाउने ।
४. लोकतन्त्र र कानुनी राज्यका पक्षधर सबै दलहरूसँग संवाद र सहकार्य गर्ने । नागरिक समाज र आम जनसमुदायसँग सहकार्य गर्ने ।