इटहरीको न्यू पूर्वाञ्चल आइसक्रिम क्याफेमा भीषण आगलागी

विराटनगर । सुनसरीको इटहरी उपमहानगरपालिका-६ स्थित न्यू पूर्वाञ्चल आइसक्रिम क्याफे र कफी सपमा भीषण आगलागी भएको छ । आज बिहान १० बजेबाट सुरु भएको आगलागी करिब ११ बजे नियन्त्रणमा आएको छ ।

‘भित्र मर्मतको कामहरू हुँदै रहेछ । बिल्डिङको काम गर्दा विद्युत सर्ट भएर आगो लागेको भन्ने कुरा आएको छ’, इलाका प्रहरी कार्यालय सुनसरीका डीएसपी सुवास हमालले संगालोखबरसँग भने, ‘अहिले आगो पूर्णरूपमा नियन्त्रणमा आएको छ ।’

Advertisement

उनका अनुसार विभिन्न स्थानबाट आएका ५/६ वटा दमकलको सहायताले आगो नियन्त्रणमा लिइएको हो । घटनाबारे थप अनुसन्धानसँगै क्षतिको विवरण संकलनको काम सुरु गरिएको छ ।