संगालोखबर 
विराटनगर । मोरङको रतुवामाई नगरपालिकामा राष्ट्रपति रनिङ शिल्ड प्रतियोगिता सुरु भएको छ । रतुवामाई नगरपालिका-६ स्थित सौँठा माध्यमिक विद्यालयमा प्रतियोगिता सुरु भएको हो ।
प्रतियोगिताको रतुवामाई नगरपालिकाका मेयर नागेश्वर प्रसाद सिंहले उद्घाटन गरेका छन् । उद्घाटन कार्यक्रममा बोल्दै मेयर सिंहले बालबालिकाको खेलप्रतिको लगाव र चौतर्फी विकासका लागि राष्ट्रपति रनिङ शिल्ड प्रतियोगिता एउटा अवसर भएको बताए ।
उनले नगरपालिकाले आगामी दिनमा प्रतियोगितालाई अझ व्यवस्थित बनाउने उल्लेख गरे । प्रतियोगिता विद्यालयमा सम्पन्न गरिने एउटा वार्षिक गतिविधिमात्रै नभएको बताउँदै उनले उत्सवका रूपमा मनाउने गरी तयारी गर्न शिक्षक र कर्मचारीलाई आग्रह गरे ।
उपमेयर दमयन्ता चुडालले बालबालिकाले घरपछि सबैभन्दा बढी समय विद्यालयमा बिताउने भएकाले उनीहरूलाई लागूऔषधको कुलतबाट बचाउन विद्यालयले विशेष निगरानी गर्नुपर्ने बताइन् ।
