संगालोखबर 
विराटनगर । मोरङको जहदा गाउँपालिका-१ बाट खाल्डोमा लुकाइएको अवस्थामा २ सय ७५ किलो ८ सय ग्राम गाँजा बरामद भएको छ । विशेष सूचनाका आधारमा खटिएको सशस्त्र र नेपाल प्रहरीको टोलीले खोल्डोमाथिबाट परालले छोपेर राखेको अवस्थामा गाँजा बरामद गरेको हो ।
मोरङ प्रहरीका सूचना अधिकारी डीएसपी हरिनन्दन चौधरीले गाँजा बरामद भएसँगै जहदा-१ का २८ वर्षीय चन्दनकुमार साहलाई नियन्त्रणमा लिइएको जानकारी दिए ।
उनका अनुसार सशस्त्र प्रहरी बल नेपाल सीमा सुरक्षा गुल्म र इलाका प्रहरी कार्यालय रानीबाट खटिएको संयुक्त टोलीले आज बिहान ६ गाँजा बरामद गरेको हो ।
पक्राउ परेका साह र बरामद गरिएको गाँजालाई इलाका प्रहरी कार्यालय रानीमा राखिएको छ । गाँजा कहाँबाट ल्याइएको र कता लैजान खोजिएको हो खुल्न बाँकी छ । यस सम्बन्धमा थप अनुसन्धान भइरहेको प्रहरीले जनाएको छ ।
