संगालोखबर 
विराटनगर । नेकपा एमालेका सचिव तथा तेह्रथुमबाट प्रतिनिधिसभा सदस्यका उम्मेदवार भानुभक्त ढकालले एमालेको विजय यात्रा नरोकिने दाबी गरेका छन् ।
विराटनगरमा आज प्रेस चौतारी मोरङले गरेको पत्रकार सम्मेलनमा ढकालले नयाँ शक्तिहरूको उदयलाई अस्थायी लहरको संज्ञा दिँदै एमालेको विजय यात्रा नरोकिने दाबी गरेका हुन् ।
उनले फागुन २१ गते हुने निर्वाचनमा एमालेले एकल बहुमत ल्याउने जिकिर समेत गरे । बालेन शाहलाई झापा–५ बाट उठाएर उनको राजनीतिक यात्रा समाप्त पार्न राष्ट्रिय स्वतन्त्र पार्टी (रास्वपा) ले नै भूमिका खेलेको हुनसक्ने उनको तर्क छ ।
उनलाई प्रधानमन्त्री र दलको नेता बनाउनुपर्ने झन्झटबाट अहिले नै मुक्त गरौँ भन्ने मनसायले रास्वपाले त्यहाँ पठाएको देखिएको उनले बताए ।
उनले सामाजिक सञ्जाल र मिडियामा देखिएको लहर अस्थायी भएको र यसले स्थापित दलीय व्यवस्थालाई विस्थापित गर्न नसक्ने उल्लेख गरे । उनले नयाँ दलहरूलाई खहरे खोलाको संज्ञा दिए ।
