संगालोखबर 
विराटनगर । कोशी प्रदेशका मुख्यमन्त्री हिक्मत कुमार कार्कीले प्रदेश आयोजना बैंकलाई समस्या नआउनेगरी सञ्चालन गर्न निर्देशन दिएका छन् ।
कोशी प्रदेश योजना आयोगको बैठकलाई सम्बोधन गर्दै मुख्यमन्त्री कार्कीले प्रदेश आयोजना बैंकमा समावेश भएका योजनाहरूलाई छुट्याएर आगामी दिनमा व्यवस्थित र चुस्त ढङ्गले सञ्चालन गर्न निर्देशन दिएका हुन् ।
Advertisement
कोशी प्रदेशमा भइरहेको बसाइसराइलाई रोक्ने गरी अध्ययन अनुसन्धान गर्न र सो अनुसारको योजना अघि सार्न पनि मुख्यमन्त्री कार्कीले निर्देशन दिए । योजनाहरूको प्राथमिकीकरण र सीमित स्रोत साधनले पुग्ने गरी छनोट गर्न र प्रदेशका गौरवका आयोजनाहरूको अनुगमन तथा मूल्याङ्कन गर्न निर्देशन दिए ।
कोशी प्रदेश योजना आयोगको आज बसेको बैठकले विभिन्न १२ वटा निर्णय गरेको आयोगका उपाध्यक्ष तारानाथ निरौलाले जानकारी दिए । प्रदेश आयोजना बैंकलाई विषयगत र तहगत रूपमा एकीकृत गरी एकीकृत प्रणालीको विकास र व्यवस्थापन गर्ने, अन्तर प्रदेश योजना आयोग सम्मेलन गर्ने लगायतका निर्णय गरेको छ ।
यस्तै प्रदेशका गौरव तथा रूपान्तरणकारी योजना र आयोजनाको प्रभावकारी अनुगमन एवम् मूल्याङ्कन गर्ने निर्णय भएको छ । कोशी प्रदेश तथ्याङ्क ऐन २०८२ को नियमावलीको मस्यौदा तर्जुमा र एकीकृत तथ्याङ्क प्रणालीको विकास गरी प्रदेशमा तथ्याङ्कलाई व्यवस्थित गर्ने निर्णय समेत गरिएको प्रदेश योजना आयोगले जानकारी दिएको छ ।
त्यस्तै घरपरिवारमा उत्पादन गरिने परम्परागत मदिराको ब्रान्डिङका लागि आवश्यक प्रविधि र कानुनी विषयमा थप अध्ययन गरी अघि बढ्ने र यसलाई अन्तिम टुङ्गोमा पुर्याउने निर्णय भएको छ ।
