धनकुटामा मोटरसाइकलले मान्छे र कारलाई ठक्कर दियो, चालकको झोला हेर्दा लागुऔषध भेटियो

धनकुटा । धनकुटाको साँगुरीगढी गाउँपालिका–७ फेदीमा आज साँझ मोटरसाइकलले पैदलयात्री र कारलाई ठक्कर दिएको छ । दुर्घटनामा तीन जना घाइते भएका छन् । मोरङबाट धनकुटा आउदै गरेको प्रदेश नं १–०२–०५४ प.६८९७ नम्बरको मोटरसाइकलले साँझ करिब ५ बजे पैदलयात्री सहिदभूमि–१ का ४८ वर्षीय भक्तबहादुर राईलाई ठक्कर दिएको हो ।

ठक्करबाट राईको दुवै हात र खुट्टामा चोट लागेको छ । स्थानीय क्लिनिकमा उनको उपचार भइरहेको छ । पैदलयात्री राईलाई ठक्कर दिएर सो मोटरसाइकलले छेउमा रोकिराखेको बा.११ च.८२४३ नम्बरको कारलाई पनि ठक्कर दिएको हो ।

दुर्घटनामा मोटरसाइकल चालक सहिदभूमि–७ का १९ वर्षीय संजिव राईको अनुहारमा सामान्य चोट लागेको छ भने मोटरसाइकलको पछाडि सवार मोरङको बेलबारी नगरपालिका–३ का १८ वर्षीय किरण मगरको शरीरका विभिन्न भागमा चोट छ । उनीहरुको अवस्था सामान्य छ ।

घटनापछि शंका लागेर मोटरसाइकलको पछाडि सवार मगरको झोला चेकजाँच गर्दा प्लाष्टिक भित्र पोको पारेर राखिएको अवस्थामा प्रतिबन्धित लागुऔषध फेला परेको प्रहरीले जनाएको छ ।

झोलाभित्र प्रतिवन्धित औषधि स्पास्पेन–१३ पत्ता १३० ट्याब्लेट र ट्रमाडोल–१३ पत्ता १३० ट्याब्लेट भेटिएको हो । लागुऔषध फेला परेपछि मोटरसाइकलमा सवार दुवै जनालाई प्रहरीले नियन्त्रणमा लिएको छ ।