संगालोखबर 
विराटनगर । जिल्ला कारागार मोरङका कैदीबन्दीलाई छालासम्बन्धी रोग देखिन थालेको छ । क्षमताभन्दा तेब्बर कैदीबन्दी भएका कारण गर्मीको समयमा छालासम्बन्धी रोगले सताउने गरेको हो ।
तीन सय क्षमता रहेको कारागारमा अहिले एक हजार ६० जना कैदीबन्दी छन् । ५० जना क्षमता रहेको महिला विभागमा एक सय एक जना कैदीबन्दी छन् । जसमध्ये ४ नाबालक, ९७ जना महिला छन् ।
Advertisement
दुई सय ५० क्षमता रहेको पुरुष विभागमा नौ सय ५९ जना कैदीबन्दी रहेका जेलर चेतराज बरालले जानकारी दिए । बरालले संगालोखबरसँग भने, ‘पुरुष विभाग तर्फ धेरै समस्या छ । महिला विभागतर्फ भने खासै समस्या छैन ।’
क्षमताभन्दा बढी कैदीबन्दी हुँदा विभिन्न सङ्क्रमणको जोखिमसँगै अन्य समस्या समेत हुने गरेको बरालले बताए । उनका अनुसार अहिले कारागारमा छालाका बिरामीको सङ्ख्या बढेको छ ।
उनले भने, ‘अहिले कारागारमा छालाका बिरामीको सङ्ख्या बढेको छ । गर्मीयाम भएकाले पनि थप समस्या भएको हो । विभिन्न अस्पतालसँगको सहकार्यमा कैदीबन्दीका लागि शिविर राखिरहेका छौँ ।’
दैनिक ७/८ जना कैदीबन्दीलाई उपचारका लागि कोशी अस्पताल पठाउने गरिएको बरालको भनाइ छ । उनले भने, ‘अहिले दैनिक ७/८ जनालाई अस्पताल पठाउने गरिएको छ । चेकजाँचपछि कतिपयलाई अस्पताल नै भर्ना गर्नुपर्ने हुन्छ ।’
क्षमताभन्दा बढी कैदीबन्दी हुँदा निम्तिएका समस्या विस्तारै समाधान हुने उनले बताए । नयाँ कारागार भवन निर्माण सम्पन्न भएपछि धेरै हदसम्म समस्याको समाधान हुने उनको विश्वास छ ।
