विराटनगरमा ‘विराट सडक महोत्सव’ हुने

विराटनगर । विराटनगरमा आगामी असोज १७ गतेदेखि ‘विराट सडक महोत्सव’ हुने भएको छ । मन्जिना मुभिज क्रियसन प्रालिको आयोजनामा असोज २३ गतेसम्म हिमालय रोडमा महोत्सव हुन लागेको हो ।

विराटनगरको ऐतिहासिकता तथा सांस्कृतिक सभ्यतालाई जीवन्त राख्दै नयाँ पिँढीमा समेत पुस्तान्तरण गर्ने उद्देश्यले महोत्सव आयोजना गर्न लागिएको आयोजक मन्जिना मुभिज क्रियसन प्रालिका अध्यक्ष जतिन ताम्राकारले जानकारी दिए ।

विभिन्न जातिका खानाका ३० वटा स्टल रहने र आफ्नै संस्कृति, परम्पराको प्रबर्द्धन गर्दै दैनिक साङ्गितिक कार्यक्रम समेत गरिने आयोजकले जनाएको छ ।

महोत्सवमा १५ लाख खर्च हुने अनुमान गरिएको अध्यक्ष ताम्राकारले जानकारी दिए । विगत चार वर्षदेखि निरन्तर महोत्सवको आयोजना गरिरहेको उनको भनाइ छ ।