दरहैयाको पाथिभरा जनता विद्यालयमा डेङ्गु सचेतना कार्यक्रम

विराटनगर । विराटनगर जेसीजले विराटनगर–१६ दरहैयास्थित पाथिभरा जनता आधारभुत विद्यालयमा डेङ्गु संक्रमण सम्बन्धी जनचेतनामूलक कार्यक्रम गरिएको छ । त्यस अवसरमा झुल पनि वितरण गरिएको थियो ।

विराटनगर जेसीजका अध्यक्ष तुलसी निरौलाको सभापतित्वमा भएको कार्यक्रममा महानगर पालिकाका जनस्वास्थ्य अधिकृत हैदर अलीले सचेतनामूलक जानकारी दिएका थिए । नेपाल एग्रो सेन्टरका सञ्चालक अनिलकुमार साहको सहयोगमा झुल वितरण गरिएको थियो ।

मुसहर बस्तीका बालबालिकालाई पढाउने उद्देश्यले आफ्नो पहलमा स्थापना गरेको विद्यालयमा विभिन्न दाताहरूले सहयोग गरिरहेको राजु क्षेत्रीले बताए । उनले स्थानीय सरकारले सहयोग नगरिरहेको अवस्थामा दाताहरूले गरेको सहयोगले धेरै सहज भएको बताए ।

दैनिक ३० जना बालबालिका अध्ययनरत रहेका र उनीहरूलाई झोला, कापी, कलम समेत आवश्यकता रहेको क्षेत्रीले बताए । विभिन्न समस्याका बाबजुद पनि बालबालिकालाई ७ वर्षदेखि निरन्तर पढाइरहेको उनले बताए ।