विराटनगरको सुधारगृहबाट भागेका दुई बालकको खोजी गर्दै प्रहरी

विराटनगर । विराटनगरको बाल सुधारगृहबाट दुईजना बालक फरार भएका छन् । फरक फरक मुद्दामा पुर्पक्षका लागि सुधारगृहमा पठाइएका उनीहरू मङ्गलबार दिउँसो फरार भएका हुन् ।

विराटनगर–३ स्थित बाल सुधारगृहमा राखिएका उनीहरू सुनसरीका हुन् । सुधारगृहका प्रमुख मिलन चौहानका अनुसार सुनसरीको कोशी गाउँपालिका–२ घर भएका बालकलाई अदालतले कर्तव्य ज्यान तथा डाँका मुद्दामा दोषी ठहर गरिसकेको छ ।

यस्तै, बराहक्षेत्र नगरपालिका–११ घर भएका बालकलाई जबरजस्ती करणी मुद्दामा अदालतले असार २८ गते पुर्पक्षका लागि सुधारगृहमा पठाउन आदेश दिएको थियो । उनीविरुद्धको मुद्दा अदालतमा विचाराधीन छ ।

चौहानका अनुसार सुधार गृहभित्र रहेको विद्यालयमा अतिरिक्त क्रियाकलाप चलिरहेका बेला पर्खाल नाघेर उनीहरु फरार भएका थिए । सुधारगृहमा दीपज्योति माध्यमिक विद्यालय छ । मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले सबैतिर समन्वय गरेर फरार भएकाको खोजी तीव्र पारिएको जानकारी दिए ।