कोशी प्रदेशमा डेङ्गु सङ्क्रमितको सङ्ख्या ६३९ पुग्यो

विराटनगर । डेङ्गु नेपालका ७४ जिल्लामा फैलिएको छ । इपिडिमियोलोजी तथा रोग नियन्त्रण महाशाखा (इडीसीडी) को तथ्याङ्क अनुसार सबैभन्दा बढी तनहुँमा फैलिएको छ ।

गत पुसको मध्यदेखि हालसम्म ३ हजार ७५५ जनामा डेङ्गु सङ्क्रमण पुष्टि भएको छ । हालसम्म गण्डकीमा १ हजार ४ सय ४८, बागमतीमा ९ सय २८, कोशीमा ६ सय ३९, लुम्बिनीमा ३ सय २८ जनामा डेङ्गु पुष्टि भएको छ ।

यसैगरी सुदूरपश्चिममा २ सय ९५, मधेशमा ६५ र कर्णाली प्रदेशमा ५२ जनामा डेङ्गु सङ्क्रमण पुष्टि भएको छ । जिल्लागत रूपमा सबैभन्दा धेरै तनहुँमा ७ सय १५, काठमाडौंमा ३ सय ५४, कास्कीमा २७४, झापामा १४७, चितवनमा १४५, पर्वतमा १३६, मकवानपुरमा ९०, गोरखामा ८५ जना डेङ्गु सङ्क्रमित भेटिएका छन् ।

अघिल्लो वर्ष ७७ वटै जिल्लामा डेङ्गु फैलिँदा ५२ हजार भन्दा बढी सङ्क्रमित भएका थिए भने २० जनाको मृत्यु भएको थियो ।