Big News

वैशाख १५ मा इलाममा हुने प्रतिनिधिसभा उप निर्वाचनका लागि प्रहरीले तीन चरणको सुरक्षा योजना बनाएर लागू गरेको छ । बझाङमा हुने प्रदेशसभा निर्वाचनका लागि पनि सोही योजना लागू गरिएको प्रहरीले जनाएको छ ।

धनकुटा नगरपालिका–६ फोक्लेण्डटापु नजिक सुमो गाडी दुर्घटना हुँदा ८ जना घाइते भएका छन् । सङ्खुवासभाको मुढे शनिश्चरेबाट धरान जाँदै गरेको को १ ज २३३८ नम्बरको सुमो आज बिहान करिब ११ः१५ बजे दुर्घटना भएको हो ।

वैशाख १५ गते हुने इलाम–२ प्रतिनिधिसभा सदस्य उपनिर्वाचनको प्रचारप्रसार उत्कर्षमा पुगेको छ । साना–ठूला सभा, घरदैलो, कार्यकर्ता भेला जस्ता कार्यक्रमलाई तीव्र पारेका दल र स्वतन्त्र उम्मेदवारहरु मत आफ्ना पक्षमा पार्न अन्तिम कसरत गरिरहेका छन् ।

स्वास्थ्य तथा जनसंख्या मन्त्रालयले तातो हावा ‘लू’ बाट बच्न आग्रह गरेको छ । तातो हावाले गर्दा मुटुको चाल तीव्र हुने, श्वासप्रश्वासमा समस्या हुने, रक्तचाप घट्ने, टाउको दुख्ने, चक्कर लाग्ने, ज्वरो आउने जस्ता समस्या देखिने मन्त्रालयले जनाएको छ ।

नेपालले कला, संस्कृति, शिक्षा, सञ्चार, युवा तथा खेलकुद, कानुनी सहायता र उद्योग वाणिज्य क्षेत्रमा कतारसँग सहकार्य गर्ने भएको छ । परराष्ट्र मन्त्रालयका प्रवक्ता अमृतबहादुर राईका अनुसार ती क्षेत्रमा सहकार्य गर्नेसम्बन्धी दुई देशबीच सम्झौता र समझदारी गरिएको हो ।

धनकुटा बजार क्षेत्रमा रहेका सामुदायिक कुकुरहरूको बन्ध्याकरण गरिएको छ । धनकुटा बजार क्षेत्रमा रहेका ७५ वटा सामुदायिक कुकुरको बन्ध्याकरण गरिएको हो । भेटेरिनरी अस्पताल तथा पशु विज्ञ केन्द्रको सहयोग लिएर धनकुटा नगरपालिकाले कुकुरको बन्ध्याकरण गराएको हो ।

भोजपुर नगरपालिका–८ पोखरेका भारत कार्कीको घरमा आगलागी भएको छ । विद्युत सर्ट भएर आज बिहान कार्कीको घरमा आगो लागेको हो । आगलागीबाट घर जलेर नष्ट भएको छ । घरभित्र रहेका सामान, लत्ताकपडा लगायत पनि जलेर नष्ट भएका छन् ।