काठमाडौं, ७ फागुन । एमालेका वरिष्ठ नेता माधवकुमार नेपालले अब राष्ट्र राजनीतिक विकास एवं समृद्धिको पथमा अघि बढेको बताएका छन् । प्रेस चौतारी नेपालले रौतहटको गौरमा सोमबार आयोजना गरेको पत्रकार सम्मेलनमा उनले समृद्धिको नेतृत्व पनि एमालेले गर्ने जिकिर गरे ।
पूर्वप्रधानमन्त्री नेपालले एमाले र माओवादी केन्द्रबीच सहकार्यको छलफल अन्तिम चरणमा पुगेकाले छिटै एकीकरण हुने दाबी गरे । उनले एकीकरणको जिम्मा दुवै पार्टीले संयोजन समितिलाई दिएको सम्भवतः आजै यस कुराको निर्णय हुने बताए ।
यस्तै पार्टी एकता संयोजन समितिको बैठक साँझ ७ बजे प्रधानमन्त्री केपी ओलीको सरकारी निवास बालुवाटारमा बस्ने भएको छ ।